ہوس کو ہے نشاط کار کیا کیا
نہ ہو مرنا تو جینے کا مزا کیا
تجاہل پیشگی سے مدعا کیا
کہاں تک اے سراپا ناز کیا کیا
نوازش ہائے بے جا دیکھتا ہوں
شکایت ہائے رنگیں کا گلہ کیا
نگاہ بے محابا چاہتا ہوں
تغافل ہائے تمکیں آزما کیا
فروغ شعلۂ خس یک نفس ہے
ہوس کو پاس ناموس وفا کیا
نفس موج محیط بے خودی ہے
تغافل ہائے ساقی کا گلہ کیا
دماغ عطر پیراہن نہیں ہے
غم آوارگی ہائے صبا کیا
دل ہر قطرہ ہے ساز انا البحر
ہم اس کے ہیں ہمارا پوچھنا کیا
محابا کیا ہے میں ضامن ادھر دیکھ
شہیدان نگہ کا خوں بہا کیا
سن اے غارت گر جنس وفا سن
شکست قیمت دل کی صدا کیا
کیا کس نے جگر داری کا دعویٰ
شکیب خاطر عاشق بھلا کیا
یہ قاتل وعدۂ صبر آزما کیوں
یہ کافر فتنۂ طاقت ربا کیا
بلائے جاں ہے غالبؔ اس کی ہر بات
عبارت کیا اشارت کیا ادا کیا
havas ko hai nashāt-e-kār kyā kyā
na ho marnā to jiine kā mazā kyā
tajāhul-peshgī se mudda.ā kyā
kahāñ tak ai sarāpā naaz kyā kyā
navāzish-hā-e-bejā dekhtā huuñ
shikāyat-hā-e-rañgīñ kā gila kyā
nigāh-e-be-mahābā chāhtā huuñ
taġhāful-hā-e-tamkīñ-āzmā kyā
faroġh-e-shola-e-ḳhas yak-nafas hai
havas ko pās-e-nāmūs-e-vafā kyā
nafas mauj-e-muhīt-e-be-ḳhudī hai
taġhāful-hā-e-sāqī kā gila kyā
dimāġh-e-itr-e-pairāhan nahīñ hai
ġham-e-āvārgī-hā-e-sabā kyā
dil-e-har-qatra hai sāz-e-anal-bahar
ham us ke haiñ hamārā pūchhnā kyā
muhābā kyā hai maiñ zāmin idhar dekh
shahīdān-e-nigah kā ḳhūñ-bahā kyā
sun ai ġhārat-gar-e-jins-e-vafā sun
shikast-e-qīmat-e-dil kī sadā kyā
kiyā kis ne jigar-dārī kā daavā
shakeb-e-ḳhatir-e-āshiq bhalā kyā
ye qātil vāda-e-sabr-āzmā kyuuñ
ye kāfir fitna-e-tāqat-rubā kyā
balā-e-jāñ hai 'ġhālib' us kī har baat
ibārat kyā ishārat kyā adā kyā
No comments:
Post a Comment